Partidu CNRT Liu Husi Estrutura CDN no CPN Hala'o Primeiru Enkontru.

Saturday, 02 February 2013 14:57          

Last Updated on Sunday, 03 February 2013 18:08          

Written by MX

Dili, MLP- Partidu Kongresu Nasional Rekonstrusaun Timor Leste (CNRT) liu husi estrutura Konsellu Diresaun Nasional (CDN) no Konsellu Politíku Nasional (CPN) hala’o primeiru enkontru hodi halo avaliasaun ba eleisaun jeral 2012.

 

Primeiru enkontru CDN no CPN ne’e , loke abertura husi Sekretáriu Jeral, Dr. Dionísio Babo no akompaña husi Prezidente CDN, Francisco Kalbuady Lay.

Iha enkontru ne’e ,Sekretáriu Jeral Partidu CNRT, Dr. Dionísio Babo , iha ninia diskursu , hateten katak enkontru ida ne’e dahuluk depois eleisaun jeral 2012.

 

“Ohin ita mai hamutuk iha fatin ida ne’e atu hala’o primeiru enkontru hodi halo aviliasaun no hato’o relatóriu jeral kampaña ba eleisaun parlamentar nian” dehan Babo iha Hotel Garden Beach Pantai Kelapa, iha Sábadu (02/02/13). Antes atu hakotu ninia diskursu, Sekretáriu Jeral ne’e apela ba Membru CPN, CDN no koordenador sira husi distritu 13 tomak katak hahú husi fulan Janeiru ba oin atividade Partidu nian la’o hanesan ba-bain.

 

Atividade ne’ebé mak atu hala’o durante periódu 2013-2017 mak hala’o re-estruturasaun ba estrutura Partidu CNRT nian iha distritu 13, halo sosializasaun baze, nomos habelar estrutura Partidu ba aldeia sira ne’ebé mak to’o agora seidauk iha.

 

Iha tempu hanesan, Prezidente Konsellu Diresaun Nasional (CDN), Francisco Kalbuady Lay hato’o ninia apresiasaun ka louva ba Membru CDN, CPN, no koordenadór husi distritu 13 tanba ita hotu nian esforsu aan tomak mak ohin loron Partidu CNRT sai boot iha Nasaun ida.

 

Primeiru enkontru CDN no CPN , paritsipa husi Sekretáriu Jeral, Dr. Dionísio Babo, Prezidente CDN, Francisco Kalbuady Lay, II Vise Prezidente Partidu CNRT, Virgilio Smith, IV Vise Prezidente Partidu CNRT, Eduardo Barreto “Dusae”, V Vise Prezidente Partidu CNRT, Januário Perreira, Membru CDN husi distritu 13, membru KP husi nasional.

 

 

Fontes: partidocnrt.com